好耐無同大家見面啦！過去一個月真的好難熬，本以為生完就快活過神仙，誰不知宜家先係進入地獄的開始。
先講下我生產前的東西吧。
2019年2月4日(年三十）早上7點左右，本身諗住起身返工，點知見紅，其實又唔係話好多血，但都叫醒左老公，老公即刻彈起身，然後我就不慌不忙咁沖涼同食早餐，因為我知道只有見紅其實未即時生得，起碼要等半日，不過為安全起見，都係去醫生檢查一下，當日老公都請左假陪我一齊去醫院。
我揀左係鏡湖生，去到醫院後比醫生檢查，哥陣我係每8分鐘陣痛一次，唔算太痛而且係不規律，比醫生內診，原來內診係醫生將唔知幾多隻手指放入陰道測下宮頸的狀況，係超．級．痛！痛過哂D陣痛，然後同我講可以揀留係醫院觀察或者返屋企等，最後我決定返屋企，同屋企人食埋團年飯先。
從醫院返到屋企，之後我就一直無宮縮過，不過應該係比醫生內診完，流左好多血，但只有短暫的流，一直到晚餐，我都係完全無反應，好彩揀左返屋企，唔係係醫院呆等咁耐又無得食團年飯會好慘！
晚餐後，我就沖涼敷面膜，食埋支雪糕，無錯，我係無忌口，孕期我唔知食左幾多違禁品啦。我記得啱啱過左零晨12點(2月5日年初一），真正的陣痛慢慢來臨，我知道真係準備要生啦，所以今次有點緊張咁收拾走佬包，滾水碌腳咁去醫院啦！
出發去醫院的造型，咪睇我笑哂咁，其實我係忍住痛咁影！
去到醫院，測左胎監同內診，都係話未生得，不過今次我同醫生講我要留係醫院，因為我有預感，好快就要生，費事又走黎走去，所以就辦左入院手續，老公一直陪住我到零晨三點先比姑娘叫走，係零晨三點到五點期間，我D陣痛一波一波咁黎，愈黎愈痛，愈黎愈密，完全瞓唔到，係張床上典黎典去，本身我無打算打「無痛分娩」，但真係頂唔住，所以通知姑娘我決定打。
我記得我係零晨5點幾入產房，第一次睇到產房，原來係一個大房間，四個角分別有一張產床，我入去哥陣，斜對角已經有位媽咪去到最後要PUSH哥個階段，嚇死我，原來生緊哥陣，其他人可以睇到，不過佢算係好冷靜，默默咁生，點解我話佢好冷靜，因為接落黎哥幾個鐘，我係痛到痴左線，亂叫亂郁，唔係我想咁癲，係真係忍唔到，好彩哥到D姑娘同助產士已經見怪不怪，由得我亂叫都無鬧我。
入左產房無幾耐，我就打左無痛，老實講，頭一個鐘係WORK既，真係無咁痛，我手上有個制，醫生話痛先按，麻醉藥就會由背部的管進入身體，會感受到一股涼感，不過，唔知係咪我按得太多，好似好快就無效，又開始劇痛，最後我係靠聞「笑氣」過左幾個鐘。聞左「笑氣」係好似飲醉左WING WING地，雖然都會感受到宮縮，但會無力叫同爭扎，我覺得笑氣仲有用過無痛針。
昏迷左幾個鐘，窗口由黑變光，我亦唔知留左幾多公升的汗，突然，我穿羊水，下體有一股暖水一直源源不絕咁流出黎，姑娘檢查後，叫我可以開始PUSH，終於去到最後的階段，但因為之前我無食野，用哂D力亂叫，又聞左笑氣，完全無力去PUSH，好心的姑娘送左兩粒金莎比我食，餵我飲左幾啖粥水，我又好似有返少少力，最後PUSH左一個幾鐘，豬仔就出左世啦！姑娘清潔完BB之後，就將佢放係我心口，原來都幾重下架，一舊野暖粒粒，好似呢個世界上只有我同佢咁，好親密！
呢個係啱啱生完的我，睇到都幾精神
所有初一寶寶都會收到醫院送的禮物，呢套床舖好靚呀！
係醫院哥3日，因為我仲未有奶，所以會餵BB食呢D醫院準備好的配方奶
初初我只有咁少，不過係正常的，而且呢D「黃金初乳」營養相當豐富，剛出世的BB的胃只有波子咁大，呢到夠哂佢食啦
沒有窮媽媽，只有懶媽媽，我信架！
第一次爆樽
自從要餵人奶，我不停灌好多湯湯水水，每日至少兩大碗魚湯和雞湯，好好彩，奶量尚算可以，餵飽到豬仔，而且好快供需平衡，唔會成日谷住。
真係買尿片都買窮
聽人話，有「兩個轉」會聰明D，唔知真唔真
度過了第一個三人行情人節，以後還有很多個第一個節日
用左兩個禮拜斷斷續續咁剪左呢條片，記錄左我的生B過程，一邊剪一邊感動
我準備左好多產後心得，之後會陸續製作，今日寫住咁多先，下次再見！
